Maiatzaren 22tik 31ra ospatuko da Europako Geoparkeen Astea
2015-05-18
- Bosgarrenez ospatuko da aurten Europako Geoparkeen Astea Zumaian, Deban eta Mutrikun; ostiralean hasi eta maiatzaren 31ra bitartean.
- Bertako ondare natural, geologiko eta kulturala herritarrei gerturatzea du helburu egitasmoak eta, horretarako, askotariko ekintzak egingo dira egun horietan Geoparkea osatzen duten hiru herrietan, haur, gazte zein helduei zuzenduta.
Euskal Kostaldeko Geoparkeak aurten ere Europako Geoparkeen Astea ospatuko du. Ostiralean hasi eta maiatzaren 31ra bitartean, ia egunero era askotariko jardueratan parte hartzeko aukera izango dute herritarrek, haur, gazte zein helduek. Adituen hitzaldiak, hegaztiei buruzko ikastaro bat, bisita gidatuak doan edota haurrentzako tailerrak egingo dira Zumaian, Deban eta Mutrikun.
Geoparkearen Asteak bertako ondare natural, geologiko eta kultural baliotsua herritarrei, bereziki, Geoparkeko biztanleei, gerturatzea du helburu nagusi, dibulgazio eta sentsibilizazio lana egitearekin batera.
Egitasmo honek bosgarren edizioa beteko du gurean. Europako geoparke guztietan ospatzen da aldi berean, lurralde bakoitzaren ondarea herritarrengana hurbiltzeko asmoz. Egun, oro har, 60 geoparketik gora daude Europan, 22 herrialde ezberdinetakoak. Europako Geoparkeen Sareak UNESCOren babesa dauka.
Ostiraletik aurrera, egitarau zabala
Geoparkeen Astea ostiralean abiatuko da, hilak 22, Deban. Arratsaldeko 17:30etik aurrera, 6 eta 10 urte bitarteko haurrak dituzten familiei zuzenduta, “Txio-txioka, Geoparkeko hegaztiekin ezkutaketan” tailer dibertigarria egingo da. Debako Agirre Jauregian izango da hitzordua eta bi orduz luzatuko da tailerra. Tailer honen bidez, gure inguruko hegaztiak hobeto ezagutzeko aukera izango dute haur zein haurrekin datozen helduek. Jolasaren bitartez hegaztien mundura hurbilduko dira parte-hartzaileak eta, horrez gainera, hegaztiak entzun, ikusi eta ezagutzeko ibilaldi txiki bat proposatuko zaie. Horretarako, prismatikoak eramatea gomendatzen zaie parte-hartzaileei.
Tailer berezi hau berriro egingo da maiatzaren 29an, hurrengo ostiralean, kasu honetan Mutrikuko familiei zuzenduta. Luardo Etxean izango dute hitzordua, 17:30etik 19:30era.
Zumaian ere egingo da hegaztiekin loturiko tailerra umeei zuzenduta, “Hegazti migratzaileen inguruko tailerra” izenburupean. Maiatzaren 29an izango da, ostiralez, eta 8-12 urte bitarteko haurrek parte hartu ahal izango dute. Algorri Interpretazio Zentroan egingo da.
Hegaztiekin lotuta, helduek ere izango dute zer ikusi eta ikasi Geoparkearen Astean. Hegaztiak behatzeko hastapen ikastaroa egingo da Zumaian hilaren 30ean. Algorriko Interpretazio Zentroan izango da, 10:00etatik 14:00etara.
Hitzaldi mamitsuak hiru herrietan
Adituen hitzaldiak ere ez dira faltako Geoparkearen Astean. Zumaian, Mutrikun eta Deban hitzaldi bana antolatu du Geoparkeak.
Zumaian, maiatzaren 23an, larunbatean, Geoparkeko Ingurumen arloak antolatuta, Natura 2000ko Urolako Itsasadarraren Kontserbazio Bereziko Eremuan egindako lanei buruzko hitzaldia hartuko du Algorri Interpretazio Zentroak. Batetik, Gorostiagan egin den zuhaitz landaketaren inguruan hitz egingo da eta, bestetik, Artadiko basoan datozen asteetan burutuko diren mehazketa lanak izango dituzte hizketarako gai. Hitzaldiaren ostean, Artadira paseoa egingo dute parte-hartzaileek, artadia eta baso honen ezaugarri nagusiak hurbiletik ezagutze aldera. Goiz osoa hartuko duen jarduera izango da, 10:00etan hasi eta 14:00ak arte. Euskaraz izango da.
Egitarauaren barruan, aipatzekoa da, halaber, Xabier Orue-Etxebarria EHUko Paelontologia Katedradunak Mutrikun eskainiko duen hitzaldia, “Euskal labeak Geoparkean” izenburupean. Hitzaldia maiatzaren 26an izango da, asteartean, 19:00etan, Zabiel Kultur Etxean. Gazteleraz izango da.
Deban, berriz, Alex Cearreta EHUko Mikropaleontologia irakaslearen hitzaldia entzuteko aukera ezin hobea izango dugu hilaren 28an, 19:00etan, Agirre jauregian, “Antropozenoa, planeta bere funtzionamendu geologiko naturaletik atera dugu?” izenburupean. Gazteleraz izango da.
Bisita gidatuak doan
Aurten ere Geoparkeak bisita gidatuak dohainik egiteko aukera eskainiko die herritarrrei. Hain zuzen, Geoparkearen eskaintza osatzen duten 12 irteeretatik 3 egin ahal izango dira doan, hala nola, “Karsteko zaporeak”, “Mutriku marinela” eta “Flysch beltza”. Irteera hauetan parte hartu nahi duten herritarrek aurrez eman behar dute izena Mutriku, Deba edota Zumaiako turismo bulegoekin harremanetan jarriz.
Irteera gidatuak noiz egingo dira:
3 bisita gidatuak euskaraz izango dira.
Aurrez izena eman turismo bulegoetan
Geoparkeak dagoeneko 8.000 triptiko baino gehiago bidali ditu hiru herrietako etxe guztietara Europar Geoparkeen Astearen egitarauaren berri emanez, eta herritarrei, haur, gazte zein helduei, parte hartzera gonbidatuz.
Bisita gidatuetan nahiz ikastaro eta tailerretan parte hartzeko aurrez izena eman behar da, Zumaia, Deba edota Mutrikuko turimo bulegoetan.
Geoparkeen Astearen egitaraua eskuratzeko: www.geoparkea.com. Sare sozialetan ere informazio eguneratua eskainiko da une oro, Facebooken (facebook.com/Geoparkea) eta Twitterren (@geoparkea).
