‘GeoparkeZaleak’ ekimena aurkeztu du Geoparkeak, entitate laguntzaileen sarea

2018-05-31

Euskal Kostaldeko Geoparkearen bueltan, topagune ireki eta parte-hartzailea izatea du helburu.

*Ikusi argazkia handiago

Gaur goizean, hilak 31, Europako Geoparkeen Astearen baitan, ‘GeoparkeZaleak’ ekimena aurkeztu da Itziarko Itxaspe Kanpinean. Euskal Kostaldeko Geoparkearen entitate laguntzaileak biltzen dituen komunitate dinamikoa eta irekia da. Gaur-gaurkoz Debako, Mutrikuko eta Zumaiako 19 entitate biltzen ditu sareak. Lurraldearekiko atxikimenduak eta ingurune sozial eta naturalarekiko konpromisoak batzen ditu, eta ekimenaren asmoa da Geoparkearen bueltan topagune irekia eta parte-hartzailea eratzea. Geoparkea zer den eta zer balio dituen zabaltzea izango du helburu nagusi.

Hasiera batean, sareak turismo arloko entitateak bildu ditu, baina atxikimendu gehiago jaso eta hazten joatea da asmoa. Honela, pixkanaka sarera batu ahal izango dira Geoparkeko ikastetxeak, elkarteak, bestelako kolektiboak eta baita norbanakoak ere.

Gaurko aurkezpen ekitaldian izan dira Gipuzkoako Foru Aldundiko Turismo zuzendaria, Maite Cruzado, eta Debako alkatea, Pedro Bengoetxea. Azken honek lankidetza publiko-pribatua azpimarratu du. Haiekin batera egon dira Mutrikuko alkatea, Jose Angel Lizardi, eta Zumaiako alkatea, Oier Korta. Udal ordezkariek bertaratu diren entitate laguntzaileak zoriondu eta esker ona adierazi diete, euren konpromiso eta ekimenagatik.

GeoparkeZaleak’ ekimenak gaur-gaurkoz 19 entitate biltzen ditu. Ia gehienak Geoparkea osatzen duten hiru herrietako, Debako, Mutrikuko eta Zumaiako, ostatuak dira. Baina bada zerbitzu turistikoak eskaintzen dituen enpresa bat ere (*ikusi entitate laguntzaileen zerrenda prentsa-oharraren amaieran). Hauek guztiek egiaztatu dute kalitate eta etengabeko hobekuntza prozesuetan murgilduta daudela. Eskaintzen dituzten zerbitzuak eta produktuak ikuskatuak izan dira eta agerikoa da Euskal Kostaldeko UNESCOren Geoparkearekiko zein iraunkortasunarekiko konpromisoa, Turismo Jasangarriaren Europako Kartaren ildotik.

Ekitaldian sareko bi ordezkarik atxikimendu-adierazpena irakurri dute, entitate laguntzaileen konpromiso eta “zereginak” biltzen dituena. Jarraian, banan-banan, entitate laguntzaileek aurrerantzean euren establezimenduetan erakutsiko duten plaka bereizgarria jaso dute.

Geoparkeak, bestalde, geoparkea.eus webgunean laguntzaile diren entitateak soilik erakutsiko ditu. Gainera, deskontu kodeak banatuko dizkie entitate laguntzaileei, bezeroen artean Geoparkeko bisita gidatuetan parte hartzeko prezio murriztuak eskaini ditzaten.

Honekin guztiarekin, Geoparkeak aitortza egin nahi die kalitatearen eta iraunkortasunaren alde lanean diharduten entitateei. Geoparkea helmuga ekoturistiko gisa kokatzen laguntzen dute; eta Geoparkeak elementu bereizgarri bat eskainiko die enpresa hauei, besteengandik bereizteko.

* Geoparkearen entitate laguntzaileen zerrenda:

  1. Arbe Hotela (Mutriku)
  2. Arriola Txiki Nekazalturismoa (Deba)
  3. Begi Bistan zerbitzu turistikoak (Zumaia)
  4. Itxaspe Kanpina (Itziar, Deba)
  5. Saturraran Kanpina (Mutriku)
  6. Zumaia Kanpina (Zumaia)
  7. Eleizondo Landetxea (Lastur, Deba)
  8. Endañeta-Berri Nekazalturismoa (Zumaia)
  9. Errotaberri Landetxea (Itziar, Deba)
  10. Goikola Landetxea (Lastur, Deba)
  11. Kanala Hotela (tziar, Deba)
  12. Lasturko Aterpetxea (Lastur, Deba)
  13. Pikua Landetxea (Mutriku)
  14. Saka Nekazalturismoa (Deba)
  15. Santa Klara Nekazalturismoa (Zumaia)
  16. Talaso Zelai Hotela (Zumaia)
  17. Txindurri-Iturri Nekazalturismoa (Itziar, Deba)
  18. Zubeltzu-Torre Nekazalturismoa (Itziar, Deba)
  19. Zumalabe Hotela (Mutriku)
‘GeoparkeZaleak’ ekimena aurkeztu du Geoparkeak, entitate laguntzaileen sarea