"Gentzianaren inurrijalea" tximeletaren banaketa-eremua ezagutzeko irteera egingo da Euskal Kostaldeko Geoparkean

Inurrijaleak (Phengaris sp.) eguneko tximeletak dira, eta bizitza ziklo bitxia bezain konplexua dute, inurrien parasitoak baitira. Tximeletok oso sentikorrak dira inguruak jasaten dituen aldaketekiko eta isolaturiko populazio txikietan egoten dira. Euskal Kostaldeko Geoparkean, Iberiar penintsulako hiru espezieetatik bi atzeman dira, Phengaris alcon eta Phengaris arion, hain zuzen ere.

Zerynthia elkarteak eta Euskal Kostaldeko Geoparkeak, Itziarko Auzo Udalaren laguntzarekin, gentzianaren inurrijalearen banaketa-eremua hobeto ezagutzea helburu duen jarduera antolatu dute abuztuaren 8rako. Zerynthia elkarteko kideek prestakuntza-saio bat eskainiko dute tximeleta zein arrautzak jartzeko aukeratzen duen lorea (Gentiana pneumonanthe) bereizten ikasteko asmoz. Jarraian, Deba-Zumaia Biotopoko hainbat gunetara hurbilduko dira tximeletaren banaketari buruzko datuak jasotzera. Bildutako informazioa intsektu bitxi hau babesteko plan bat lantzeko erabiliko da.

Ekimenean tximeleta-zaleek eta, oro har, interesa duten herritar guztiek parte hartu ahal izango dute. Hitzordua Itziarko Burugorri Elkartean izango da, goizeko 9:30ean, eta 13:30era arte luzatuko da. Parte-hartzaileei asegurua egingo zaie eta amaieran mokadutxoa eskainiko zaie. Aldez aurretik izena ematea beharrezkoa da ingurumena@geoparkea.com epostara idatziz. Parte-hartzaileei gomendatzen zaie sakelako telefonoa, praka luzeak, mendian ibiltzeko oinetako egokiak, eguzkitik babesteko txapela eta krema eta ura eramatea.

Argazkia: Yeray Monasterio

Gentiana pneumonanthe (Argazkia: Juan Carlos Vicente Arranz)