Basoko hegazti gautarrak entzuteko txangoa, ekainaren 9an
2023-06-05
Pasa den maiatzaren 12an euriagatik bertan behera geratu zen ekimena berreskuratu eta datorren ostiralerako, ekainaren 9rako, antolatu du Euskal Kostaldeko Geoparkeak basoko hegazti gautarren entzunaldia. Aranzadi Zientzia elkarteko adituek lagunduta, hegazti gautarrak ikertzeko teknikak ezagutu eta erabiliko ditugu Simon Berasaluze plazatik 20:30ean abiatuko den txangoan. Zortea lagun badugu, gure etxetik oso gertu -baina ezkutuan- bizi diren hegaztiak entzungo ditugu.
Behin abiapuntuan elkartuta, adituen azalpenak eta txangoan zehar kontuan hartu beharko gomendioak entzungo ditugu. Ondoren, bi ordu inguruko ibilbidea egingo dugu, herritik gehiegi urrutiratu gabe. Hori bai, bide estuetan ibiliko gara eta ilunpetan zeharkatuko ditugu; beraz, zapata eta arropa egokiak eraman beharko dira, eta bidea argiztatzeko eskuko edo kopetako linterna bat. Irteera doakoa da eta azalpenak euskaraz emango dira.
Parte hartu nahi duten herritarrek aurrez eman behar dute izena lotura honetan, Debako Turismo Bulegoan aurrez aurre edo 943 19 24 52 telefonoan (astelehenetik larunbatera 10:00-14:00 eta 16:00-19:00; eta igandean, goizez bakarrik), plazak mugatuak dira eta.
Erronkaz betetako behaketa
Beharbada, hegaztiak dira zale gehien erakartzen duen animalia taldea, eta, zenbait herrialdeetan fanatismotik gertu dagoen zaletasuna sorrarazten dute. Haien edertasun soila, beren aniztasun handia, lurreko ia habitat guztietan aurkitu ahal izatea, eta, zalantzarik gabe, leku zabaletan, landazabaletan, aintziretan edo paduretan ikusteko erraztasunak bihurtzen ditu hain preziatu. Alabaina, behatzea ez da hain erraza baso trinkoetan, harkaitzetan edo animalia askoren babesleku den gauaren iluntasunean ere.
Hala, bada, toki helezin horietan hegaztiak aztertzeko zeharkako teknikak erabili behar dira nahitaez. Horietako bat arrastoak bilatzea da, oinatzak edo gorotzak, esaterako, eta, beste batzuetan, belarria zorroztu behar da, haien lurraldea inbaditu gabe identifikatu ahal izateko.
