Maiatzak 30 | GeoTalks - Itsaso sakoneko misterioa

James Cameron film zuzendari eta ekoizle entzutetsuak duela 15 urte Zumaian filmatu zuen “Volcanes del mar profundo” (Volcanoes of the Deep Sea) dokumentalaren emanaldia egingo du Euskal Kostaldeko Geoparkeak maiatzaren 30ean, Geoparkeen Europako Astearen baitan antolatu dituen ekitaldien artean. 45 minutuko iraupena du filmak eta itsaso sakonera bidaia zirraragarria egiteko gonbidapena egiten du. 

Emanaldiaren ostean, solasaldi irekia egingo da eta itsaso sakoneko misterioen inguruan arituko dira bi zientzialari eta komunikatzaile ezagun:

• Thierry Juteau, Bresteko Unibertsitateko katedradun emeritua, geologoa. Alvin batiskafoaren barruan sartuta, fumarola beltz aktiboak ikusten lehen zientzialaria izan zen Juteau. Itsaso sakoneko misterioak ondoen ezagutzen dituen zientzialarietako bat da, dudarik gabe.

• Carlos Briones, CSICeko Astrobiologia zentroko ikertzailea eta bizitzaren jatorriari buruz ikertu duen zientzialari ezagunenetakoa. Biokimikaren arloan izan duen ibilbide oparoaz gainera, Briones poeta, idazlea eta estatu espainiarreko dibulgatzaile ezagunenetakoa da. Publikazioen artean, nabarmentzekoa da bere azken liburua “Orígenes. El universo, la vida y los humanos”, Prisma 2016 zientzia dibulgazioko liburu onenaren saria jasotakoa.

Asier Hilario, Geoparkeko zuzendari zientifikoak moderatzaile lanak egingo ditu. Zientziari, bizitzari eta itsaso sakonari buruz arituko dira eta aukera ezinhobea izango da bi aditu hauek elkarrekin ikusi eta entzuteko. 

Ekitaldia irekia izango da. Zumaiako Aita Mari zinean egingo da, 19:00etatik aurrera.