Geoturismoari buruzko nazioarteko kongresu batean parte hartzen ari da Geoparkea
2013-10-29
Euskal Kostaldeko Geoparkea Geoturismoari buruzko nazioarteko kongresu batean parte hartzen ari da egunotan Cabran (Kordoba). Kongresua atzo hasi zen eta bihar arte iraungo du. Nazioarteko 300 aditu elkartu dira bertan lurraldeen garapen ekonomikorako Geoturismoak eskaintzen dituen potentzialitateak aztertu asmoz.
Zumaia, Deba eta Mutrikuko alkateak, Iñaki Agirrezabalaga, Maider Zubikarai, eta Joseba Palenzuela, hurrenez hurren, eta Leire Barriuso, Geoparkeko gerentea eta Asier Hilario, Zuzendari Zientifikoa, Geoturismoari buruzko nazioarteko kongresu batean parte hartzen ari dira, atzo hasi eta bihar arte, Cabra herrian (Kordoba).
Hain zuzen, Asier Hilariok, Geoparkeko Zuzendari Zientifikoak, ‘Creación y Desarrollo de Producto Turístico’ izenburuko mahai-inguruan parte hartu du gaur goizean.
Kongresu honek esperientzien elkartrukea eta geoturismoko ibilbideak sustatzeko aukerak sortzea ahalbidetuko du, bereziki Geoparke eta babestutako ingurune naturalen kasuan.
‘Geoempleo’ proiektua
Kongresua “Geoempleo: Geodibertsitatea enplegu-hobi gisa” proiektuaren baitan kokatzen da. Helburuen artean daude, batetik, ondare geologikoaren eta ingurune sozioekonomikoaren arteko harremanaren estutzea, bertako biztanleen inplikazio aktiboa lortuz; jarduera ekonomiko jasangarriak hobetzeko erremintak sortzea; lankidetza zientifikoa, ekonomikoa eta soziala bideratzeko modu edota prozedurak finkatzea; ondarearen interpretaziorako, dibulgaziorako eta ondare hau balioan jartzeko metodologia berriak garatzea.
Kongresu honek ondare geologikoak lurralde bateko industria geoturistikoa garatzeko eskaintzen duen potentzialtasuna ondo ezagutzeko balioko du, bertako giro, ondare, estetika, kultura eta biztanleen bitartez. Hain zuzen, turismo geologikoak aisialdiarekin lotzen ditugun eta berezitasunen bat duten lekuetan burutzen diren jarduera guztiak batzen ditu, geologiarekin lotutako elementuak nabarmenduz, eta jasangarritasun eta espazioaren kontserbaziorako irizpideekin proiektatuz.
