Geoparkeak bisita gidatuen denboraldi berria aurkeztuko du ostiralean
2018-03-11
PRENTSAURREKO DEIALDIA.
Ostiralean, martxoak 16, 10:00etan, Zumaiako Pulpo Elkartean (Erribera, 22) Euskal Kostaldeko UNESCOren Munduko Geoparkeak 2018ko bisita gidatuen denboraldi berria aurkeztuko du.
Aurtengo berrikuntzen artean, Geoparkeak bisita gidatu berria estreinatuko du, “Enigma bizia” izenburupean. Zumaiako Udalak sustatuta, proposamen berri honen xedea da Geoparkera gerturatzen diren bisitariei euskara eta euskal kulturaren berri ematea, ezagutzera eman beharreko ondarea ere badenez gero. Prentsaurrekoan eskainiko dira zehaztasun guztiak; Kike Amonarriz soziolinguista, bisitaren edukia lantzen ibili den kidea, bertan izango da.
Euskal Kostaldeko Geoparkea Debako, Mutrikuko eta Zumaiako udalerriek osatzen dute, eta UNESCOren Munduko Geoparkea da 2015az geroztik. Izendapen honek lurraldearentzako kalitate marka eta mundu mailako proiekzioa bermatzen du.
Bertan izango dira:
- Maria Jose Telleria, Gipuzkoako Foru Aldundiko Kultura zuzendaria
- Garbiñe Mendizabal, Gipuzkoako Foru Aldundiko Hizkuntza Berdintasuneko zuzendaria
- Oier Korta, Zumaiako alkatea eta Euskal Kostaldeko Geoparkeko presidentea
- Pedro Bengoetxea, Debako alkatea
- Jose Angel Lizardi, Mutrikuko alkatea
- Kike Amonarriz, soziolinguista
- Leire Barriuso, Geoparkeko gerentea
